तनहुँ २०८२ श्रावण १३
बिहान उठ्ने बित्तिकै एक गिलास मनतातो पानी पिउनु स्वास्थ्यको लागि निकै लाभदायक मानिन्छ । आयुर्वेद, आधुनिक विज्ञान, र प्राकृतिक उपचार प्रणालीमा समेत मनतातो पानी पिउने बानीलाई शरीरको शुद्धिकरण र रोग प्रतिरोधात्मक क्षमता वृद्धिको लागि उपयोगी मानिएको छ । विशेषगरी खाली पेटमा पिएको मनतातो पानीले हाम्रो पाचन प्रणालीदेखि लिएर छालाको सौन्दर्यसम्ममा सकारात्मक असर पार्दछ ।
बिहानको समयमा हाम्रो शरीर रातभरको विश्रामपछि पुनः सक्रिय हुन थाल्दछ । यो समयमा पाचन तन्त्र पनि खाली हुन्छ र यसलाई सक्रिय बनाउनका लागि मनतातो पानी एक प्राकृतिक उपाय हो । मनतातो पानीले पेटभित्रको टक्सिन अर्थात विषाक्त पदार्थलाई बाहिर निकाल्न मद्दत गर्दछ । यसले कब्जियत, ग्यास, पेट दुख्ने, एसिडिटीजस्ता समस्याबाट राहत दिलाउँछ ।
शरीरको मेटाबोलिजम (पाचन प्रक्रिया) सुधार्न पनि मनतातो पानी प्रभावकारी हुन्छ । खाली पेट मनतातो पानी पिउँदा शरीरको तापमान अलिकति बढ्ने भएकाले बोसो जल्दा बढ्दछ र तौल नियन्त्रणमा राख्न सहयोग पुग्दछ । यसले मोटोपन घटाउन चाहनेहरूका लागि एक सस्तो र असरदार उपायको रूपमा काम गर्दछ ।
पानीमा कागतीको रस मिसाएर पिउँदा यसले भिटामिन ‘C’ को मात्रा थपिदिन्छ र प्रतिरोधात्मक शक्ति बलियो बनाउँछ । यसले छालालाई चम्किलो बनाउने, अनुहारबाट डन्डीफोर हटाउने र छालाको प्राकृतिक निखार ल्याउने काम गर्छ ।
मनतातो पानीले शरीरमा रक्तसञ्चारलाई सन्तुलित राख्न पनि सहयोग पुर्याउँछ । यसले हृदयघात तथा उच्च रक्तचापको जोखिम कम गर्छ । यसरी, सादा मनतातो पानीले पनि शरीरभित्रका धेरै समस्यामा सुधार ल्याउन सक्ने देखिन्छ ।
बिहान उठ्ने बित्तिकै चिसो पानी वा चिया-कफी पिउनु शरीरलाई झट्का दिनुजस्तै हो । चिसो पानीले पाचन क्रिया सुस्त बनाउँछ भने अत्यधिक चिया वा कफीले एसिडिटी, डिहाइड्रेसनजस्ता समस्या निम्त्याउन सक्छ । यसको सट्टामा मनतातो पानी पिउनु एक स्वस्थ विकल्प हो ।
कलेजो सफा राख्न र किड्नीलाई सक्रिय बनाउन पनि मनतातो पानी उत्तिकै आवश्यक हुन्छ । यसले पिसाबको माध्यमबाट शरीरको विकार बाहिर निकाल्न मद्दत गर्छ ।
अध्ययनहरूले पनि देखाएका छन् कि बिहानको समयमा मनतातो पानी पिउनु हाइड्रेसनको राम्रो तरिका हो र यसले तनाव घटाउन मद्दत गर्दछ । तनाव कम हुँदा दिमाग पनि ताजा महसुस हुन्छ र दिनभर ऊर्जा प्राप्त हुन्छ ।
नियमित रूपमा यो अभ्यास अपनाउने हो भने स्वास्थ्यमा दीर्घकालीन रूपमा सकारात्मक प्रभाव देखिन्छ । यसका लागि धेरै खर्चिलो औषधि वा उपचारको आवश्यकता पर्दैन । केवल एक गिलास मनतातो पानीले शरीरलाई तन्दुरुस्त बनाउन सक्दछ ।
यसकारण, बिहान उठ्ने बित्तिकै मनतातो पानी पिउनु केवल परम्परागत बानी मात्र होइन, यो विज्ञानले पनि प्रमाणित गरेको लाभदायक अभ्यास हो । स्वास्थ्यप्रेमीहरूका लागि यो सजिलो तर असरदार उपाय मानिन्छ ।
– असल मित्र खबर
